สุขสหคตํ กุสลํ ธมฺมํ ปฏิจฺจ สุขสหคโต กุสโล ธมฺโม อุปฺปชฺชติ เหตุปจฺจยา… ตีณิฯ

อุเปกฺขาสหคตํ กุสลํ ธมฺมํ ปฏิจฺจ อุเปกฺขาสหคโต กุสโล ธมฺโม อุปฺปชฺชติ เหตุปจฺจยาฯ (1)

ปีติสหคตํ กุสลญฺจ สุขสหคตํ กุสลญฺจ ธมฺมํ ปฏิจฺจ ปีติสหคโต กุสโล ธมฺโม อุปฺปชฺชติ เหตุปจฺจยา… ตีณิฯ (สพฺพตฺถ ทสฯ สพฺพตฺถ วิตฺถาโรฯ)

[100] ปีติสหคตํ อกุสลํ ธมฺมํ ปฏิจฺจ ปีติสหคโต อกุสโล ธมฺโม อุปฺปชฺชติ เหตุปจฺจยา… ตีณิฯ

สุขสหคตํ อกุสลํ ธมฺมํ ปฏิจฺจ สุขสหคโต อกุสโล ธมฺโม อุปฺปชฺชติ เหตุปจฺจยา… ตีณิฯ

อุเปกฺขาสหคตํ อกุสลํ ธมฺมํ ปฏิจฺจ อุเปกฺขาสหคโต อกุสโล ธมฺโม อุปฺปชฺชติ เหตุปจฺจยาฯ (1)

ปีติสหคตํ อกุสลญฺจ สุขสหคตํ อกุสลญฺจ ธมฺมํ ปฏิจฺจ ปีติสหคโต อกุสโล ธมฺโม อุปฺปชฺชติ เหตุปจฺจยา… ตีณิฯ (สพฺพตฺถ ทสฯ สพฺพตฺถ วิตฺถาโรฯ)

[101] ปีติสหคตํ อพฺยากตํ ธมฺมํ ปฏิจฺจ ปีติสหคโต อพฺยากโต ธมฺโม อุปฺปชฺชติ เหตุปจฺจยา… ตีณิฯ

สุขสหคตํ อพฺยากตํ ธมฺมํ ปฏิจฺจ สุขสหคโต อพฺยากโต ธมฺโม อุปฺปชฺชติ เหตุปจฺจยา… ตีณิฯ

อุเปกฺขาสหคตํ อพฺยากตํ ธมฺมํ ปฏิจฺจ อุเปกฺขาสหคโต อพฺยากโต ธมฺโม อุปฺปชฺชติ เหตุปจฺจยาฯ (1)

ปีติสหคตํ อพฺยากตญฺจ สุขสหคตํ อพฺยากตญฺจ ธมฺมํ ปฏิจฺจ ปีติสหคโต อพฺยากโต ธมฺโม อุปฺปชฺชติ เหตุปจฺจยา… ตีณิฯ (สพฺพตฺถ ทสฯ สพฺพตฺถ วิตฺถาโรฯ)

8-1. ทสฺสนตฺติก-กุสลตฺติกํ

1-7. ปฏิจฺจวาราทิ

เหตุปจฺจโย

[102] เนวทสฺสเนน นภาวนาย ปหาตพฺพํ กุสลํ ธมฺมํ ปฏิจฺจ เนวทสฺสเนน นภาวนาย ปหาตพฺโพ กุสโล ธมฺโม อุปฺปชฺชติ เหตุปจฺจยาฯ (สพฺพตฺถ เอกํฯ)

[103] ทสฺสเนน ปหาตพฺพํ อกุสลํ ธมฺมํ ปฏิจฺจ ทสฺสเนน ปหาตพฺโพ อกุสโล ธมฺโม อุปฺปชฺชติ เหตุปจฺจยาฯ (1)

ภาวนาย ปหาตพฺพํ อกุสลํ ธมฺมํ ปฏิจฺจ ภาวนาย ปหาตพฺโพ อกุสโล ธมฺโม อุปฺปชฺชติ เหตุปจฺจยาฯ (1) (สพฺพตฺถ ทฺเวฯ สพฺพตฺถ วิตฺถาโรฯ)

[104] เนวทสฺสเนน นภาวนาย ปหาตพฺพํ อพฺยากตํ ธมฺมํ ปฏิจฺจ เนวทสฺสเนน นภาวนาย ปหาตพฺโพ อพฺยากโต ธมฺโม อุปฺปชฺชติ เหตุปจฺจยาฯ (สพฺพตฺถ เอกํฯ)

9-1. ทสฺสนเหตุตฺติก-กุสลตฺติกํ

1-7. ปฏิจฺจวาราทิ

เหตุปจฺจโย

[105] เนวทสฺสเนน นภาวนาย ปหาตพฺพเหตุกํ กุสลํ ธมฺมํ ปฏิจฺจ เนวทสฺสเนน นภาวนาย ปหาตพฺพเหตุโก กุสโล ธมฺโม อุปฺปชฺชติ เหตุปจฺจยาฯ (สพฺพตฺถ เอกํฯ สพฺพตฺถ วิตฺถาโรฯ)

[106] ทสฺสเนน ปหาตพฺพเหตุกํ อกุสลํ ธมฺมํ ปฏิจฺจ ทสฺสเนน ปหาตพฺพเหตุโก อกุสโล ธมฺโม อุปฺปชฺชติ เหตุปจฺจยาฯ

ภาวนาย ปหาตพฺพเหตุกํ อกุสลํ ธมฺมํ ปฏิจฺจ ภาวนาย ปหาตพฺพเหตุโก อกุสโล ธมฺโม อุปฺปชฺชติ เหตุปจฺจยาฯ (สํขิตฺตํฯ)

เหตุยา ฉ, อารมฺมเณ ทส, อธิปติยา ทฺเว…เป.… อวิคเต ทสฯ (สพฺพตฺถ วิตฺถาโรฯ)